Bichry Bulbul Ko Thikane Ka Pata Mil Na Saka!

by **Naseem Abbas Malik** Sun Apr 15, 2012 1:35 pm

Aaj mamool-e-musarraf se
nikal kar main ne

Teri khamosh nigahon ka
sabab socha hai

Main ne socha hai tere honton ki
gustakhi ko

Teri gumnaam wafaon ka
sabab socha hai

Hal-e-masoom pe kis tarha
qayamat tooti

Kyun sada de ke bhi khamosh
koi laot gaya

Kyun musafir ke qadam toot
gaey manzil par

Khawb kyunkar huey ek chashm
ke reza reza

Aaj un sari khataon ka
sabab socha hai

Teri gumnaam wafaon ka
sabab socha hai

Yun zara lehja-e-guftar bhi
kuch khaas na tha

Baat sehne ka magar zabt
tere paas na tha

Dosh tujh par yeh nahi hai
keh bura tha tu bhi

Yeh haqeeqat hai mohabbat mein
naya tha tu bhi

Kuch raqeebon ki anaaon ka
sabab socha hai

Teri gumnaam wafaon ka
sabab socha hai

Jis ne hasrat ko zah-e-chashm
sulagte dekha

Khud ko moo bole gunahon pe
machalte dekha

Haalat-e-dard mein saya bhi
jise chhor gaya

Shakhs jo zulmat-e-ilzam pe
damm tor gaya

Aisi be'dard sazaon ka
sabab socha hai

Teri gumnaaam wafaon ka
sabab socha hai

Koh-e-hasrat pe jo baadal tha
barasta hi gaya

Par fizaaon pe laga daagh
kabhi dhul na saka

Dhalte saaey mein sabhi panchhi
thikano ko chale

Bichhre bulbul ko thikane ka pata
mil na saka

Hoti kyun dhoop mein chhaon ka
sabab socha hai

Teri gumnaam wafaon ka
sabab socha hai

Kin usoolon pe mohabbat ne
jafa di mujh ko

Tera mujrim tha zamane ne
saza di mujh ko

Mehrbaani hai teri tu ne jo
insaaf kiya

Ja aey baatil....!
Kisi mujrim ne tujhey maaf kiya!

"""""""""""""""""